Nánar um Vísindagarða

Vísindagarðar eru þyrpingar þekkingarfyrirtækja sem staðsett eru í eða við háskólaumhverfi. Markmið með uppbyggingu slíkra garða er að skapa öflugt nýsköpunar- og viðskiptaumhverfi með tilheyrandi samlegð fyrir fyrirtækin og háskólana sem þar koma saman. Fyrsti vísindagarðurinn, og jafnframt einn sá þekktasti, er við Stanford háskóla í Kaliforníu. Þar spratt síðar upp Kísildalurinn, Silicon Valley.

Vísindagarðar gegna víðast í vestrænum samfélögum stóru og sívaxandi hlutverki við að efla og auka framþróun þekkingarhagkerfisins og draga að sér ungt menntað vinnuafl: mikilvægustu auðlindina í þekkingarhagkerfi framtíðarinnar.

Vísindagarðar eru fyrst og fremst samfélag. Samfélag háskóla, þekkingarfyrirtækja og rannsóknarstofnana sem leggja hvert öðru lið með sambúðinni. Boðleiðir styttast og stórir og smáir aðilar geta unnið saman að því að finna bestu lausnina hverju sinni, auk þess sem nándin og fjölbreytnin ýtir undir óvæntar og frjóar hugmyndir.

Háskóli Íslands er langöflugasti og stærsti rannsóknarháskóli landsins. Hann er staðsettur í miðborgarumhverfi, en þetta tvennt skapar kjöraðstæður fyrir þróun nútímalegra vísindagarða. Háskólinn hefur hlutverki að gegna við miðlun þekkingar til atvinnulífs í þeim tilgangi að efla samkeppnishæfni lands og þjóðar.

Árið 1961 veitti Reykjavíkurborg Háskóla Íslands umráð yfir landinu sem Vísindagarðar standa á með því skilyrði að þar yrðu reistir vísindagarðar. Þá var svæðið ekki nema mýri en árið 1999 komst uppbyggingin á skrið þegar Íslensk erfðagreining hóf að byggja sínar höfuðstöðvar sem opnuðu 2003.

Árið 2004 var stofnað félag um reksturinn á svæðinu til framtíðar. Félagið starfar í þágu almennings og eru tveir eigendur: Háskóli Íslands (94,5%) og Reykjavíkurborg (5,5%).

Bílastæði milli Grósku og Alvotech

Fyrstu 15 mínútur eru fríar. Eftir það er gjaldið 170 kr/klst frá 07:00-17:00 virka daga.

Bílakjallari Grósku

Fyrstu 15 mínútur eru fríar. Gjaldið er 320 kr. fyrir fyrsta klukkutímann, 150 kr/klst eftir það.

Bílastæðin við húsið

Stæðin eru ekki gjaldskyld, enn sem komið er.

Innheimta bílastæðagjalda byggir á álestri bílnúmera við innakstur. Greiðslur er aðeins hægt að inna af hendi rafrænt. Engar greiðsluvélar eru á svæðinu.

Þeir sem nota Autopay appið verða rukkaðir sjálfkrafa en fyrir aðra eru QR kóðar víða um bílastæðið sem má nota til að ganga frá greiðslu með greiðslukorti.

Ef ekki er gengið frá greiðslu innan 48 klst. frá brottför er lagt á aukastöðugjald (4.800 kr.) sem sendist í heimabanka bíleiganda.

Sækja Autopay app

Vísindagarðar eru tengslatorg nýsköpunar á Íslandi. Tengslatorg atvinnulífs og háskóla, vísinda og viðskipta, frumkvöðla og stöndugri fyrirtækja. Markmiðið er að gefa fyrirtækjum og stofnunum kost á að starfa í háskólaumhverfi þar sem samlegðaráhrif atvinnuulífs og rannsóknastofnana fá að njóta sín. Þannig byggjum við brú milli háskólasamfélagsins og atvinnulífsins, stóreflum hagnýtingu rannsókna og stuðlum að aukinni verðmætasköpun til heilla fyrir land og þjóð.

Meðal samstarfsaðila eru Háskóli Íslands, Félagsstofnun stúdenta, Íslensk erfðagreining ehf., Alvotech hf., Alvogen ehf., CCP hf., Lífvísindasetur Háskóla Íslands, Gróska ehf., Miðstöð hönnunar og arkitektúrs.

Við val á leigutökum er horft til þess hvað þeir geti lagt til samfélagsins á svæðinu, samhljóms við stefnu félagsins, alþjóðlegra tenginga, fjárhagslegs bolmagns og vægis nýsköpunar og þróunar innan fyrirtækisins. Áherslan er á starfsemi á sviði líftækni, upplýsingatækni, orku og sjálfbærni.

Viðskiptamódel Vísindagarða Háskóla Íslands byggir á því að leigja lóðir til fyrirtækja sem vilja byggja upp sína starfsemi á svæðinu. Félagið sér um að velja fyrirtæki og stofnanir inn á svæðið og reka það sem heild. Vísindagarðar leigja lóðirnar til 50 ára með möguleika á framlengingu. Tekjurnar af lóðarleigunni eru notaðar til þess að byggja upp nýsköpunarsamfélag þar sem grunnrannsóknir og vísindi eru undirstaðan.

Dæmi: Árið 2013 gerðu Vísindagarðar og Alvogen með sér samning um leigu á lóðinni Sæmundargötu 15-19. Á lóðinni var fyrirhuguð uppbygging Alvogen á hátæknisetri til þróunar og framleiðslu hátæknilyfja undir hatti Alvotech.

Alvotech greiðir í dag rúmar 500 krónur á hvern byggðan fermetra á lóðinni ofanjarðar á mánuði. Er það sama gjald og Gróska ehf. greiðir fyrir lóðina að Bjargargötu 1. Mánaðarlegar tekjur Vísindagarða fyrir lóðaleigu af þessum tveimur lóðum eru nú í kringum 20 m.kr. Þeim fjármunum er varið til að vinna að framtíðarsýn Vísindagarða sem er að vera suðupottur nýsköpunar sem leiðir framþróun og skapar virðisauka fyrir land og þjóð.

Á þeim tíma sem samningur Vísindagarða og Alvotech var gerður bauð Reykjavíkurborg öllum þeim sem voru að byggja í Reykjavík og þurftu að greiða gatnagerðargjöld, að skrifa undir skuldabréf vegna þeirra, en gatnagerðargjöld renna til Reykjavíkurborgar. Reglur varðandi greiðslu gatnagerðargjalda hafa síðan breyst hjá Reykjavíkurborg.

Nánari upplýsingar veitir framkvæmdastjóri félagsins.

Sjá hér.