Höfuðstöðvar CCP færast í Grósku
Á dögunum flutti tölvuleikjafyrirtækið CCP höfuðstöðvar sínar í Grósku. Skrifstofurnar eru á 3ju hæðinni og hafa vakið verðskuldaða athygli fyrir áhugaverða hönnun og almenn smekklegheit. Andrúm og David Pitt hönnuðu skrifstofurýmið.
Markmið Grósku er að hýsa í framtíðinni öflug fyrirtæki á borð við CCP sem, eins og áður segir, verður með sínar höfuðstöðvar á 3. hæð hússins. Ávinningur CCP er það umhverfi sem verður til með Vísindagörðum þ.e. þar sem fyrir eru Íslensk erfðagreining og lyfjafyrirtækið Alvogen, auk glæsilegra stúdentagarða. Breiddin í starfsemi Háskóla Íslands, hin mikla fjölbreytni námsgreina og fagsviða og sterkar alþjóðlegar tengingar skapa ótal tækifæri til samvinnu um úrlausn verkefna þar sem saman kemur fólk með ólíkan bakgrunn og unnið er þvert á fræðigreinar.